राष्ट्रियसभाका १८ सांसदको विदाई, खतिवडा फेरी मन्त्रि वन्ने

मातृभूमी संवाददाता । २० फागुन काठमाण्डौ
राष्ट्रियसभाबाट विदाई भएका सांसदहरुले राष्ट्रियभालाई प्रभावकारी ढंगले भूमिका निर्वाह गर्न शुभकामना दिएका छन् । आफ्नो २ बर्षे कार्यकालको समय सकिएका सांसदहरुले आफ्ना अनुभव राख्दै सभालाई थप जिम्मेवार भएर अघि बढ्न शुभकामना दिएका हुन् ।
राष्ट्रियसभाको मंगलबारको बैठकमा मन्तव्य राख्दै उनीहरुले सरकारलाई थप जिम्मेवार बन्दै जनताको सवालमा खरो उत्रिन, भ्रष्टाचार न्यूनीकरण गरि शुसासन कायम गर्न तथा समग्र रुपमा जनताको सवाललाई आत्मसाथ गर्न आग्रह गरे । अध्यक्ष गणेश तिमिल्सिनाले २ वर्षे पदावधि कायम भएका सांसदलाई यस अवधिमा पु¥याएका योगदानका लागि धन्यवाद दिए । ‘यहाँहरुको अथक मेहनत र प्रयासबाट राष्ट्रियसभाले महत्वपूर्ण उपलब्धी हासिल गरेको छ’ उनले भने ।
नेकपा संसदीय दलका नेता दीननाथ शर्माले राष्ट्रियसभाबाट विपक्षी दलका नेता र प्रमुख सचेतक विदाइ हुन लागेकोमा दुख लागेको बताए । उनले अहिले विदाइ भएकाहरु आगामी २ वर्षमा हुने निर्वाचनबाट पुन निर्वाचित भएर आउन सक्ने भन्दै शुभकामना दिए । राष्ट्रियसभा प्रमुख प्रतिपक्षी दलका नेता सुरेन्द्र पाण्डेले आफूले दुई वर्षको अवधिमा विपक्षी दलको नेता हुँ भन्ने महसुस गर्न नपरेको बताए । राष्ट्रियसभा अध्यक्ष, सत्तारुढ र अन्य दलका सांसद र कर्मचारीबाट राम्रो सहयोग पाएको उनको भनाइ थियो ।
सुरु–सुरुमा राष्ट्रियसभालाई सञ्चार माध्यमले पनि बेवास्ता गरेको भन्दै पाण्डेले पछिल्लो समय राष्ट्रियसभामा बोलेका र उठेका विषयले पनि महत्व पाउन थालेको बताए । नेता पाण्डेले सत्तारुढ दल नेकपा र सरकारलाई लोकतान्त्रिक प्रणालीको संरक्षणमा ध्यान दिन आग्रह गरे ।
नेपाली कांग्रेसका राष्ट्रियसभा सदस्य बद्रीप्रसाद पाण्डेयले प्रविधिको प्रयोग, समयमा बैठक सञ्चालन गर्नेलगायत विभिन्न पक्षमा २ बर्षमा राष्ट्रियसभामा राम्रो अभ्यास गरिएको बताए । उनले राष्ट्रियसभा अधिकारको दृष्टिले केही संकुचन भए पनि सिर्जनात्मक र प्रभावकारी ढंगले दलीय आग्रह पूर्वाग्रहबाट मुक्त भएर काम भएको बताए ।
नेकपाका कालीबहादुर मल्लले आफूले राष्ट्रियसभा सदस्य भएर २ बर्षको कार्यकालमा धेरै कुरा सिक्ने अवसर पाएको र ‘प्रमाणपत्र सहित एउटा योग्यता प्राप्त भएको’ अनुभव गरेको बताए । ‘महाविद्यालयको विद्यार्थी, मैले ज्ञान आर्जन गर्ने थुप्रै मौका मिल्यो र आज म एउटा शिक्षकको रुपमा रिर्टायड हुन खोजिरहेको छु । मलाई त्यो अनुभूति भइरहेको छ’ उनले भने ।
नेपाली कांग्रेसकी राष्ट्रियसभाका लागि प्रमुख सचेतक सरिता प्रसाईले जनताको चाहना र इच्छा अनुसार काम गर्न सरकारलाई आग्रह गरिन् । सिंगो शासन व्यवस्था प्रति निराशा नभई जनतालाई आशा जगाउने गरी काम गर्न शुभकामना दिइन् ।
राष्ट्रियसभा सदस्य हरिचरण शिवाकोटीले जनता निराश नहुने गरी राम्रोसंग सबै दलहरुलाई मिलेर मुलुक सञ्चालन गर्न आग्रह गरे । त्यसैगरी राष्ट्रियसभा सदस्यहरु कमलाकुमारी ओली, खेमराज नेपाली, धनकुमारी खतिवडा, बलराम बास्कोटा, मीना बुढा, मुक्ताकुमारी यादव, युटोल तामाङ, रमेशप्रसाद यादव, राजकुमार कुवँर, विन्दादेवी आले रानाले पनि विदाइको क्षणमा आफ्ना अनुभव राखेका थिए ।
राष्ट्रियसभाले मंगलबार विदाइ हुने सबै सांसदलाई बोल्न ५ मिनेट समय दिएको थियो । मंगलबारदेखि बिदा हुने राष्ट्रियसभा सदस्यहरुमा नेकपाबाट ८, नेपाली कांग्रेसका ६ , राजपाका २, समाजवादी पार्टी नेपालका १ र राष्ट्रपतिबाट मनोनित एक जना गरी १८ रहेका छन् । दुई बर्षे कार्यकाल भएका कांग्रेसका सांसद दुर्गाप्रसाद उपाध्यायको भने निधन भइसकेको छ ।

खतिवडा फेरी पनि मन्त्रि वन्ने

अर्थमन्त्री डा. युवराज खतिवडाले पदबाट राजीनामा दिएका छन् । मंगलबारै राष्ट्रियसभाको दुई वर्षे कार्यकाल सकिएपछि खतिवडाले मन्त्री पदबाट राजीनामा दिएका हुन् । खतिवडाले मुख्य सचिव लोकदर्शन रेग्मीमार्फत राजीनामा दिएका हुन् । मंगलबार राजीनामा दिएका खतिवडाले बुधबार पुनःमन्त्री पदको कार्यभार सम्हाल्ने छन् । उनले बुधबार अर्थ र सञ्चार मन्त्रीको नियुक्ति लिएर सपथग्रहण गर्ने बताइएको छ ।
यसअघि कार्यकाल विभाजनका क्रममा गोलाप्रथा गरिँदा खतिवडा सहित १९ जना राष्ट्रियसभा सदस्यले २ वर्षे कार्यकालको चिट्ठा उठाएका थिए । राजीनमा दिए पनि खतिवडा आगामी ६ महिनासम्म मन्त्री हुन पाउनेछन् । यही संवैधानिक प्रावधान अनुसार खतिवडालाई बुधबार पुनःमन्त्रीमा नियुक्त गर्न लागिएको हो । खतिवडालाई प्रधानमन्त्री केपी शर्मा ओलीले मन्त्रीमा पुनःनियुक्त गर्ने जानकारी नेकपा संसदीय दलका उपनेता सुवास नेम्वाङले दिएका छन् । संवैधानिक व्यवस्था अनुसार सांसद नभए पनि खतिवडाले मन्त्रीका रुपमा ६ महिनासम्म काम गर्न पाउनेछन् ।
खतिवडा मन्त्रीमा कायमै रहेको अवस्थामा नयाँ आर्थिक वर्षको बजेट पनि ल्याउनेछन् । खतिवडासँग सेयर बजार असन्तुष्ट छ । उनी हट्ने संकेत पाएसँगै केही दिनअघि सेयर बजार बढेको थियो । तर खतिवडाले निरन्तरता पाउने खबरले सेयर बजार पुनः ओरालो यात्रामा छ । मन्त्री खतिवडा राष्ट्रपति विद्यादेवी भण्डारीले मनोनित गर्ने कोटाबाट राष्ट्रिय सभामा आएका थिए ।
तर केही दिनअघि नेकपा सचिवालय बैठकले राष्ट्रपतिबाट मनोनित गर्ने कोटामा उपाध्यक्ष वामदेव गौतमलाई पठाउने निर्णय गरेको छ । तर उक्त निर्णयलाई पार्टीका एकजना अध्यक्ष तथा प्रधानमन्त्री केपी शर्मा ओलीले अस्वीकार गरिदिएका छन् । यही विवादका कारण राष्ट्रियसभामा को जाने भन्ने समस्या नेकपाभित्र कायमै छ । यसअघि नेकपा नेकपा स्थायी कमिटी बैठकले एकै व्यक्तिलाई दुई पटक राष्ट्रियसभामा नपठाउने निर्णय गरेको थियो । तर प्रधानमन्त्री केपी शर्मा ओली खतिवडाको पक्षमा उभिएका छन् ।

Leave a Reply

Your email address will not be published. Required fields are marked *

error: Content is protected !!