विधुत प्राधिकरण दैलेखवाट ठगिदै सेवाग्राही

मातृभूमी संवाददाता । ०८ पौष दैलेख
नेपाल विधुत प्राधिकरण वितरण केन्द्र दैलेखले ग्राहकलाई ठग्ने गरेको पाईएको छ । वितरण केन्द्र दैलेखले मिटर रिडिङ गर्दा ठग्ने गरेको पाईएको हो । दैलेख सदरमुकाममा सेवा ग्राहीको घरमा मिटर रिडिङ गर्ने क्रममा प्राधिकरणले सेवाग्राहीलाई ठग्ने पाईएको छ ।
प्राधिकरणले सेवाग्राहीलाई थमाएको विलमा ४० युनिट खपत भएकोमा १५५ युनिट उल्लेख गरी विल थमाएको छ । एक सेवाग्राहीले नाम नछाप्ने शर्तमा भने, ‘चार पाँच सय विल आउँथ्यो यसपाली १४ सय आयो । यस विषयमा पढेलेखेकालाई सोध्दा आफु ठगिएको पाएँ ।’
हुन पनि वितरण केन्द्र दैलेखले सेवाग्राहीलाई थमाएको विलमा कार्तिकमा ५५ युनिट मात्र खपत भएको देखिन्छ । तर मंसिरमा भने १५५ युनिट खपत भएको उल्लेख छ । विलमा साविकको अंक ११७८५ र हालको अंक ११८२५ छ साविक र हालको अंक अनुसार ४० युनिट हुनुपर्नेमा प्राधिकरणले १५५ युनिट उल्लेख गरी १४१० रुपैयाको विल सेवाग्राहीलाई थमाएको छ ।
पिडित सेवाग्राहीले नाम नछाप्ने शर्तमा मातृभूमी अनलाइनसँग कुरा गर्दै भने, ‘सदरमुकाममै त प्राधिकरणले यसरी ठगिरहेको छ । गाउँका सोझासाझा जनतालाई झन् के गरिरहेको होला ? कार्तिकमा जम्मा ५५ युनिट आएको थियो । त्यसको भुक्तानी पनि अनलाईन मार्फत गरी सकेका थियौँ । तर मंसिरमा १५५ युनिट आयो । म अचम्ममा परे । मंसिरमा न पंखा चलाएका छौँ । न फ्रिज चलाएका छौँ । न पानी तान्ने मोटर चलाएका छौँ । नत हिटर नै वालेका छौँ । आफैले चेकजाँच गर्दा प्राधिकरणले हामीलाई ठगेको रहेछ । सदरमुकाममा त ठग्ने प्राधिकरणले गाउँका सोझा जनतालाई झन् के गरेको होला ?’
यो त एउटा प्रतिनिधी घटना मात्र हो । यसरी ठगिनेमा कयौँ सेवाग्राही हुन सक्छन् । यस विषयमा सम्वन्धीत र सरोकारवाला निकायको ध्यान जान जरुरी छ ।